قال الفنان مصطفى فهمى، إن الطلاق يحدث عندما تكون الحياة غير صحية، أو أن الأمر وصل إلى حد النقطة الأخيرة، فيجب أن ينفصل الشخص، لافتا إلى أن أول عامين من الزواج كان في هناك بعض المشاكل مثل الملابس وغيرها، وكانت فيه خلافات مستمرة.
مصطفى فهمي وفاتن موسى
وأكد فهمى، خلال لقائه ببرنامج “الحكاية” الذى يقدمه الإعلامي عمرو أديب، أن الناس كانت بتشوف صورنا على السوشيال ميديا أننا سعداء للغاية، لكن الحقيقة عكس كده، مشيرا إلى أنه يمكن أن تظهر للناس مبتسماً، ولكن عندما تذهب للمنزل تواجه المشاكل والنكد، وما يحدث بين الطرفين، تراكم من المشاكل، “الكوباية اتملت”.
وقال فهمي: جاء قرار الطلاق بسبب خناقة كبيرة، حيث إننا كنا هنسافر للبنان علشان نحضر فرح أختها، ولكن وجدت أن لبنان تتعرض لقصف وضرب رصاص في نفس الوقت، وبعدين قلت مش هسافر، لكنها اعترضت وقالت لازم نسافر.
وأضاف: “الخناقة عليت جدا بينا، وصوتنا علي على بعض، وأخدت قرار الطلاق من جوايا، وبعد ما سافرت طلقتها، خصوصا أن الحياة أصبحت مستحيلة بينا.
تصريحات مصطفى فهمي
قال الفنان مصطفى فهمي، إن فهم الرجل للمرأة، أمر صعب للغاية، مشيرًا إلى أن النساء يعيبهن المزاجية والتغير دائمًا: «استحالة تقدر تفهم المرأة لأنها متغيرة جدا، وإحنا مزاجيين جدا لأننا بنعيش الحالات اللي بنمثلها، أنا مش موظف، ومواعيدنا كلها متلخبطة، المرأة هي المرأة لو عاوزة تريحك هتريحك».
وأضاف فهمي ، أن الكثير من السيدات يحرصن على افتعال المشاكل مع أزواجهن: «في ست بتبقى عاوزة تعكنن ودول كتير أوي مش حالات نادرة، بيقولوا يا داهية لما تكون مبسوط وده في مصر والعالم كله دي جينات ملهاش علاقة بالشخصية».
وحول سر التغير في مشاعر الرجل والمرأة بعد الزواج، أوضح: «بعد الجواز الدنيا بتتغير والست بتعتبر الراجل ملكها، والأول بيبقى بعيد عنها، لكن بعد ما تبصم أعمل فيك اللي أنا عاوزاه».
وواصل: «في ستات بتصحى الصبح بتتخانق مع دبان وشها، الواجهة بتبقى لطيفة وحلوة لكن لما تعيش في البيت الموضوع بيبقى حاجة تانية، فهمت الكلام ده بعد التجارب اللي عديت منها، عديت بـ3 تجارب، الأخيرة فهمتني الموضوع كله».
وحول حب السيدات للهدايا، قال: «الهدايا مش بتبقى كفاية، بعد شوية بيبقى في حاجات تانية، وبعدها بتبقى حاجات تالتة، وعموما الحب بعد الجواز بيتحول لعشرة ولما بنخش في الحياة بين 4 حيطان وبتبقى عشرة حلوة أو وحشة».
وتطرق إلى سر المشكلات الكبيرة التي تعقب الانفصال، موضحًا: « لما تقول مش قادر أكمل بيبتدي الهجوم عليك، لازم أشوف حياتي، والخناقات لو مستمرة ليه أبقى مكتئب لما أروح بيتي، وفي طرف تاني بيبقى مش عاوز أمشي، فبتحصل مشاكل».
حسين فهمي
وقال الفنان مصطفى فهمي، عشت تجربة الزواج لثلاث مرات، علاقتي بحسين فهمي بقت كويسة جدًا اليومين دول بسبب إننا غير مرتبطين.
واضافت فهمي، خلال حواره مع الإعلامي عمرو أديب، ببرنامج الحكاية: أنا وحسين فهمي أشهر عزاب في الوطن العربي حاليًا، وحظنا وحش في الستات وخصوصًا اليومين دول.
فيلم السرب
كشف الفنان مصطفى فهمي عن احدث اعماله الفنية معلقا : “أقوم بدور رئيس المخابرات المصرية في فيلم السرب مع الفنان أحمد السقا”، مضيفًا استبطت بالشخصية من خلال قراءة جديدة لسيرة رؤساء المخابرات في مصر”.
وقال فهمي, خلال لقائه مع الاعلامى عمرو اديب: أن أول أعماله في السينما كان “فيلم النداهة”، مضيفًا: “جاءت بدايتي الحقيقة في عالم السينما عند قيامي بتمثيل ثاني أفلامي أميرة حبي أنا مع الفنانة سعاد حسني، ثم تلاها فيلم الجنس الناعم مع النجم محمود عبد العزيز”.
