قال مؤدي المهرجانات حمو بيكا: “عرفت قيمة التعليم بسبب موقف محرج حصل معايا في مطار أمستردام وفاتتني الطيارة بسبب إني مش عارف اتكلم مع حد وفضلت أكلم نفسي، ولو أنا متعلم كنت عرفت أتعامل مع الناس”.

وتابع خلال مداخلة هاتفية ببرنامج “كلام الناس” المذاع على قناة “إم بي سي مصر”:”لقيت الناس في مطار أمستردام بيكلموا الناس وأنا مش عارف أتكلم مع حد ولو أنا متعلم ما كنتش احتجت لحد ولا الطيارة فاتتني”.

وأضاف حمو بيكا: “نجاحي من غير التعليم ولا عمل أي حاجة معايا لما اتعرضت لمشكلة في مطار أمستردام، وحاسس إني أطرش وأعمى لأني ما بعرفش أقرا ولا أكتب”.

وأكمل: “بقول لطلاب الثانوية العامة العلم والتعليم بيستر وهو كل حاجة حلوة في الحياة، وكتير اتضحك عليا في فلوس ومضيت على حاجات مش عارفها لأني ما بعرفش أقرا ولا أكتب وللأسف فات الأوان ومفيش وقت أتعلم دلوقتِ”.

وعن آخر تطورات حياته المهنية، قال حمو بيكا: “أنا سبت مصر واستقريت في دبي علشان أشتغل، ومفيش شغل في القاهرة”.

وأكد: “قررت أعيش في دبي بشكل كامل علشان أعرف أشتغل ومصر وحشتني ونفسي أرجع تاني، وبعاني مع نقابة الموسيقيين بقالي 5 سنين ومش عارف أعمل إيه”.
ووجه مؤدي المهرجانات حمو بيكا رسالة مؤثرة لطلاب الثانوية العامة، مع اقتراب امتحاناتهم في 26 يونيو الجاري، ولطلاب الجامعات، طالبهم بأن يهتموا بتعليمهم وشهاداتهم، قائلًا إنه غير متعلم، وحصل على “محو الأمية” بعد مشقة، مؤكدًا أن طعم النجاح مع العلم يختلف عن طعم النجاح بدون علم.
وكتب حمو بيكا تدوينة على الفيس بوك “رسالة لطلاب الثانوية العامة والكليات”.. هو انا اه مش متعلم واخدت (محو الأمية) بالعافية، لكن ده مش حاجه تفرح ولا تقول (عندك بيكا اهو مش متعلم بس ناجح)، صدقوني والله طعم النجاح مع العلم مختلف تمامًا عن طعم النجاح من غير علم”.

وقال حمو بيكا: “العلم بيفرق في كل حاجه في الدنيا، كمية معاناة بشوفها يوميًّا بسبب إني مش متعلم كبيرة أوي مش بتمني حد منكم يشوفها أو يتعرض لها، العلم بيستر كتير اوي وبيخليك واعي ومتفتح في كل مجالات الحياة”.