أحيا اليوم الفنان أشرف عبد الباقي، ذكرى رحيل الفنان علاء ولي الدين، عبر حسابه الرسمي على موقع التواصل فيسبوك.

وقال عبد الباقي: “زي النهارده من عشرين سنة اتوفى علاء، ربنا يرحمه ويغفر له يا رب، وبرغم إن فات عشرين سنة على وفاته لكنه كان وما زال أقرب صديق ليا”.

وأضاف:” أول مرة أطلع عمرة كان معاه واحنا رايحين الكعبة قالي بص في الأرض لغاية ما نوصل والكعبة تبقى باينة وأقولك بص وادعي ويمكن الحكاية دي بقيت أعملها مع أي حد يعمل عمرة لأول مرة وادعي لعلاء”.

وتابع: “في حياته كنت بشوف الخير اللي بيعمله مع ناس كتير وأتعلم منه بشكل مباشر وغير مباشر، علاقتنا كانت أكتر من إخوات ومن خلاله كنت بشوف باقي أصحابنا لأنه كان كريم جدا ومضياف جدا”.

وأكمل: “وفي بيته كنت بحس إني في بيتي وإن والدته الله يرحمها زي والدتي اللي اتوفت وأنا في سن صغيرة، وخالد أخوه الله يرحمه ومعتز ربنا يكرمه ويخليه لأولاده زي إخواتي وقت ماكنت أحس إني متضايق أروحله أتكلم معاه وأرتاح، ماكانش يعدي يوم إلا لما نتقابل أو نتكلم في التليفون نعرف أخبار بعض”.

https://www.facebook.com/AshrafAbdilBaky/posts/758591332299919

وأردف: “صادف أن يوم وفاته كان أول يوم عيد الأضحى وبعد ما وقف على الأضحية اتوفى وكنا على ميعاد يومها في المسرح لعرض مسرحية “لما بابا ينام” اللي انتهت بوفاته، ربنا يرحمك يا علاء ويصبر أهلك وأصحابك اللي أكيد مادام عرفوك عمرهم ماهينسوك”.

يذكر أن الفنان علاء ولي الدين توفي يوم 11 فبراير عام 2003، بعد أن حقق شهرة كبيرة في السينما وتصدرت أفلامه شباك الإيرادات ومنها فيلمه الشهير “الناظر”.