أجاب الدكتور علي جمعة مفتي الجمهورية السابق، على سؤالٍ وجهته له طفلة تقول «إزاي الشيطان هيدخل النار هو أساسا من النار؟».
وخلال برنامج «نور الدين» على قناة «ON»، أجاب جمعة قائلا: «هو مش نار.. زي إنتي مش طينة.. إنتي مخلوقة من تراب.. هل إنتي تراب ولا لحم ودم.. الشيطان كمان مخلوق من نار ولو مات يتحول إلى لهيب.. زي الإنسان لما يموت يتحول إلى تراب».
وأضاف أن الملائكة خُلقت من النور لكنها ليست نورًا (يقصد ضوءًا)، تماما كما حال الشيطان الذي خُلق من نار بينما هو ليس نارًا.
كما تلقى جمعة، سؤالا من طفلة أخرى تقول: «هل الشيطان هو اللي بيتحكم في كوابيسي.. هل الجاثون حقيقي؟».
ورد قائلا: «لما ربنا خلق الإنسان خلقه جسما وحط فيه الروح، وتحديدا في الشهر الرابع للجنين في بطن أمه، لكن قبل الـ4 أشهر ينمو نموا نباتيا، وعند ولادته تدخل فيه النفس».
وأشار إلى أن هذه النفس عبارة عن إنسان مثلث، بمعنى جسم بداخله روح، فيما توجد النفس داخل الروح.
وتابع مخاطبا الطفلة: «لما بتنامي النفس بتطلع من الجسم اللي بيكون فيه روح تخلي الإنسان يتنفس ويهضم وتشغل الدورة الدموية».
ورد عن الكوابيس قائلا: «ممكن تكون من الشيطان أو من أكلة تقيلة سخيفة أكلناها ونمنا بعدها.. والناس لما لقوا إنها ممكن كده وممكن كده فسموها الجاثوم وتخيلوا إن فيه حاجة اسمها كده بتطبق على الإنسان.. لكن الحقيقة إن الملائكة بتتدخل والشيطان ممكن يتدخل والنفس ممكن تتكلم مع نفسها أو الثقل الجسدي بسبب المرض أو أكلة مش كويسة».
