رد الفنان تامر حسني على رسالة الفنان محمد سامي له وتذكره ما فعله معه في بداية مشواره مع الإخراج وتعاونهما في مسلسل “آدم”.
وكتب تامر حسني تعليقا على منشور محمد سامي: “يا سامي يا حبيبي يا ابن الناس الطيبين شكرا من كل قلبي على كل حرف خارج من قلبك كتبته في حقي، خلتني أدمع يا سمسم ، أولا أنا صدقت موهبتك من وانت صغير سنا لإنك فعلا موهوب موهبه مش عادية وتاريخ نجاحاتك يشهد بكده، كنت عارف وأنا بقدمك إني بقدم مكسب حقيقي للصناعة ومن يوم ما سجلت رقمك على تليفوني وهو مكتوب سامي ابني، عشان كان إصراري على تقديمك كان بقلب أب مش صديق من سنك أب مصدق في ابنه وعارف إن الناس مش هيدوله فرصة يطلع عشان سنه صغير”.
وتابع تامر حسني: “الحمدلله برحلتك ورحلتي أثبتنا للدنيا إنها مش بالسن لأ !!!!… بالمجهود والتعب والشطارة والمذاكرة وانت كل الصفات دي كانت فيك وأنا لوحدي اللي عارف، عشان كده صممت إن الدنيا كلها تعرف معايا حجم موهبتك الحقيقي، حتى أعمالي اللي من إخراجك ليها مكانة خاصة في قلوب الناس”.
وأكمل تامر حسني: “مسلسل آدم، فيلم أهواك، فيلم تصبح على خير
ولسه إن شاء الله نجاحات جايه مستنيانا مع بعض، ربنا يوفقك يا حبيبي في كل شغلك اللي جاي وتكسر الدنيا وفي القمة زي عادتك، يا محمد شكرا تاني على البوست الصادق ده شكرا يا أصيل يا محترم، ربنا يخلينا دايما لبعض ضهر وسند”.
وكان محمد سامي نشر صورة قديمة له مع تامر حسني وتذكر كيف وقف بجانبه في بداياته وتمسك به لإخراج مسلسل “آدم”.
يشار إلى أن تامر حسني ينشغل في تصوير أحدث أفلامه “ري ستارت” مع هنا الزاهد، باسم سمرة، محمد ثروت، وغيرهم، والفيلم من تأليف أيمن بهجت قمر، وإخراج سارة وفيق.
