من الشخصيات المميزة والتي تعمل في خدمة المواطنين مفتش مالي واداري تموين مدينة بلبيس ا- ياسمين عبدربه التي شرحت كيفية اضافة المواليد الجدد لبطاقة التموين واوضحت جميع العقبات بالشرح وكيفية التعامل كالتالي
الشروط :-
١/ البطاقه التموينيه لازم تكون ساريه ومفيش فيها اى اخطاء .
٢/ المواليد اللى هتتضاف من ٢٠٠٦/١/١
لغاية ٢٠١٥/١٢/٣١ .
٣/ عدد الاطفال اللى ممكن تتضاف ع البطاقة الواحده بحد اقصي تلاته ٣ ( يعنى بالكتير ٣ عيال بس اللى تقدر تضيفهم على بطاقتك ) .
لو لاقينا الشروط دى تنطبق على حالتنا نيجى ع اللى بعده
الفئات اللى ممكن تسجل اولادها وحددها الوزير :-
١- الموظف ( حكومي – عام – خاص )
ودا من بكرة جرى على شغله يجيب مفردات مرتبه معتمد ومختوم .. لو اكتر من ٢٥٠٠ جنيه ماتروحش التموين ولا تفكر تضيف عيالك اصلاً.
٢- المعاش ( حكومي – عام – خاص )
هنجيب شهاده بالمعاش ولو اكتر من ٢٠٠٠ جنيه ايديك ف ايد اخوك اللى فات وروحووووو على بيتكم.
٣- الارمله / المطلقه / المرأه المعيله .
٤- اصحاب الامراض المزمنه / ذوي الاحتياجات الخاصه .
٥- القصر وليس لديهم عائل .
٦- العمال / المهنيون / الحرفيون / الحاصلون على مؤهلات وبدون عمل … دول يعملو بحث اجتماعى ف الشئون الاجتماعيه اللى جمب بيتهم بان دخلهم اقل من ٢٠٠٠ جنيه ف الشهر.
زى ما اتفقنا لو شرط واحد بس من اللى قولناه مش عندك اقعد على جمب ووسع لغيرك وشوف مصلحتك
لو ينطبق عليك كل اللى فات تعالى نشوف اللى بعده
الاوراق المطلوبه :-
١- استمارة اداء خدمه ( ودى م المكتب التموينى اللى انت تبعه ) .
٢- شهادة بالدخل (اللى قولنا عليه فوق مش اكتر من ٢٥٠٠ لو موظف ، مش اكتر من ٢٠٠٠ لو معاش او بحث اجتماعى ) .
٣- صور البطاقات الشخصيه للى موجودين ف البطاقه ولو اقل من ١٦ سنه نجيب صورة شهاده الميلاد .
٤- صورة شهادة ميلاد الطفل اللى عايزين نسجله .
٥- اقرار بصحة البيانات ( عشان لو سولت لك نفسك تزور الدخل وانت بتاخد على قلبك ألوفات الجنيهات تستحمل اللى هيجرالك
٦- متنساش تكتب رقم موبايل صاحب البطاقه واتأكد انك كتبته صح وانه يكون متسجل باسمك فى شركه المحمول عشان اي غلط بسيط بيدوخك و يدوخنا معاك .
لو كل اللى فات تمام تعالى بأه على اهم نقطة ف الحوار دا كله
الوزير قسم الناس لتسع شرايح على حسب رقم البطاقه التموينيه ،،،،
يعنى سعادتك هتمسك بطاقتك التموينيه وتشوف اول رقم م اليمين وتبص ع الجدول الجاي تشوف الفترة اللى تروح فيها للمكتب عشان تسجل عيالك ( يعنى لاتروح قبلها بيوم ولا بعدها بيوم )
لو مكتوب اول رقم م اليمين (٠)صفر تروح من يوم ١ اغسطس ليوم ١٠ اغسطس
لو مكتوب ١ تروح من ٨/١١ : ٨/١٧
لو مكتوب ٢ تروح من ٨/١٨ : ٨/٢٤
لو مكتوب ٣ تروح من ٨/٢٥ : ٨/٣١
لو مكتوب ٤ تروح من ٩/١ : ٩/٧
لو مكتوب ٥ تروح من ٩/٨ : ٩/١٤
لو مكتوب ٦ تروح من ٩/١٥ : ٩/٢١
لو مكتوب ٧ تروح من ٩/٢٢ : ٩/٢٨
لو مكتوب ٨ تروح من ٩/٢٩ :١٠/٠٥
لو مكتوب ٩ تروح من ١٠/٠٦ : ١٠/١٢
ماتروحش غير ف ميعادك،،،، إن فاتك الميعاد بلاش تروح بمزاجك عشان الزحمه ومفيش داعى تعطل نفسك لان مش هيتعملك حاجه،،،
طب تعمل ايه :
تستنى اخر اسبوعين ف شهر اكتوبر من ١٠/١٣ لغايه ١٠/٣١ دول مخصصين للى معرفوش يروحو مكتب التموين .. كل الشكر لرئيس القسم الاستاذ محمد محمد الاعصر وتعليمات مدير الادارة الاستاذ رضوان عبدالمطلع حسن.
