العنوان صحيح ولم تخدعك عيناك أو إن نظرك لا سمح الله بقى “شيش بيش” ومش قادر تميز بين حرف الحاء والخاء ومحتاج تلبس نضارة “قعر كباية” ..العيد فرحة هكذا غنت صفاء أبو السعود ومن طيبة قلبنا صدقناها، كما نصدق الحكومة.

فقد علمونا وإحنا فى المدارس إن  القطنة قصدى الحكومة مبتكدبش  وإن فاتك الميرى اتمرغ فى ترابه إحنا فى أيام مفترجة والضرب فى الميت حراااام ..ومش عاوزين ننكد على بعض فيها خلينا نفرح ونظأطط  ونخرج العيال ونأكلهم لحمة كفاية إننا ضحكنا عليهم فى عيد رمضان وقلنا لهم مصاريف رمضان أخدت اللى ورانا واللى قدامنا يمكن مش ح نعرف نخرجكم فى “الضحية”  لما كانوا عاوزين يخرجوا ..بس قولوا يا فرج الله  ودلوقتى ح نقول لهم إيه؟ .. ده عيد لحمة مش عيد خروج ..إحنا اللى دبسنا نفسنا طالما عيد لحمة يبقى فين اللحمة اللى ح ياكلوها   ولا إن العيد مش بتاعنا إحنا وبتاع الخرفان- مش الإخوان – محدش جاب سيرة حيوانات دلوقتى أو حاجة وحشة اوعى دماغك تروح لبعيد…طيب الجو حر ما صدقنا أغسطس خلص وقلنا نخرج والجو يتعدل طلع  أغسطس راشى سبتمبر ومستخبى وراه  وإحنا مقضينها فسحة ما بين الأنترية والبلكونة وأوضة النوم والمكوث فى جزيرة القطن- السرير- هو فى أحلى من كده ..بس يا ريت الحكومة متقولش إن البلد زاد فيها النسل..يعنى إيه ذنيا إننا ننزل فى الزحمة وفى الحر ده وتقعد تشم ريحة  عرق ناس معرفتش يعنى إيه استحمام من سنة فاتت ولا اللى لابس قميص بقاله على جتته قرون بحجة إنه فيه صفتين من صفات الله كما قال توفيق الحكيم ” القدم والوحدانية” مفيش أحسن من قعدة البيت هو الراجل له إيه غير بيته لا ست بتنفع ولا عيال بتشفع …اقعد قلب ريموت التليفزيون يمين شمال مش ح تلاقى غير اللى شفته زى العيد اللى فات مسرحيات محفوظة وأفلام تتكرر كل عيد ومناسبة ويقولك إن الممثل الفلانى مثل 700 فيلم و20 مسرحية طيب فين ..اعرضوا لنا ولا اتنين لكل ممثل…اسكت يا لسانى خلينى ساكت أحسن …أنا أحسن حاجة أعملها أخلى الوليه مراتى تدبح  لنا جوز الفراخ الشمورت وتعمل لنا شوية ملوخية وشوربة ترم العضمتين ونلم  العيال حوالينا بعشرة جنيه لب وسودانى ونقعد مع بعض سيبك أنت مفيش أحسن من اللمة  هو العيد إيه غير إنك تكون شايف اللى  بتحبهم بخير ..وكل يوم أنت فيه بخير عيد …سيبنى بقى أستمتع بالفرختين  مع تسجيل لصوت خرافى – جاية من صوت الخروف- يعنى  وهو بيعزف أحلى نغمات ….مااااااااااء …مااااااااء..العيال مستمتعين بيها.. بلاش حسد ولا نق يا عم …ده العيد فرخة .