ناشدت الإعلامية ريهام سعيد مكتب العمل ونقابة الإعلاميين بالتدخل لحل الأزمة بينها وبين قناة النهار.

وكشفت ريهام سعيد في فيديو عبر صفحتها الشخصية بـ”فيس بوك” القصة اكاملة مؤكدة أن سبب غيابها عن الشاشة ليس بيدها وإنما بسبب تلفزيون “النهار” حسب قولها ، مؤكدة أن الأزمة بدأت بعد خروجها من السجن على خلفية اتهامها بخطف أطفال في الحلقة الشهيرة ، مشيرة إلى أن القناة اشترطت عليها التجديد لمدة 3 سنوات لكي يسمحوا لها بالخروج على الهواء وليس في حلقات مسجلة”.

وأضافت: “القناة أنذرتني بأنني إن لم أحضر لعملي خلال 15 يوم فسوف يجعلوني أدفع 100 مليون جنيه ، ولما ذهبت للقناة فوجئت أنهم يمنعوني من الدخول واكتشفت أنه كمين وبعدها وجدت القناة تنشر الفيديو على صفحة برنامجي تحت عنوان (فضيحة ريهام سعيد) تخيلوا الأمر”.

وقالت “ريهام” في الفيديو:  “مكنتش ناوية أطلع أتكلم خالص، كل ما أقابل حد في الشارع انتي فين، بطلتي، اعتزلتي عندك مشاكل، وحشتينا، أنا عارفة ان مش كل الناس بتحبني لكن أنا كان دايما نجاحي وحلقاتي اللي كانت على يوتيوب بتحقق مشاهدة عالية أوي، كان بيجيلي عيب فظيع ان الناس بتتفرج على فيديو مقتطع صغير أوي بيتشال نصفه الأولاني والأخير بحيث إنه يديك إيحاء إننا برنامج بيفبرك وبيقول حاجات مش صح، وبينقل التخلف وده مش حقيقي احنا برنامج عظيم، أعظم برنامج في الشرق الأوسط، احنا اول ناس نعمل مدرسة لذوي الاحتياجات ونقول إن فيه حاجة اسمها قوقعة، أول ناس نعالج شباب كتير من الإدمان”.

واستدركت : “مبنتقضاش أجر على أي خير أو تبرعات أو نسبة، بنعمل ده لربنا بس، مجهود فظيع لمدة 14 سنة مش عايزة اتكلم عن نفسي كتير، طالعة اقول أنا فين أنا موجودة لكن تليفزيون النهار مانعني من الظهور، أول ما أنا خرجت من السجن وطول ما كنت هناك الناس دي موقفتش جنبي خالص مفيش حد جالي النيابة، وكل تصريحاتهم في الجرايد لا تعليق، وهما عارفين اني لا يمكن أعمل كده، إزاي أم أو ست حامل في شهرها التاسع بتخطط لخطف أطفال وعندها ولد وبنت تانيين، الحمد لله عدت على خير طلعت من السجن ومش مكسورة، أنا قوية جدا عندي ثقة اني اشتغل واخدم بلدي اكتر واكتر”.

وتابعت ريهام في رسالتها المصورة:  “كنت متأكدة ان ربنا بيبتلي اللي بيحبهم عشان يقربوا منه اكتر، بعد التجربة دي راجعت نفسي اتغيرت في حاجات كتير قربت من ربنا اكتر ومنكسرتش، النهار كانوا عايزين يكسروني عشان مجددتش عقدي وأنا مكنتش هجددوا لانهم موقفوش جنبي لا ماديا ولا معنويا ودي مش أول مرة ميقفوش جنبي، وهما عارفين كويس اني معملتش حاجة. فوجئت لما طلعت من السجن عايزة اطلع على برنامجي بقالي 4 شهور مباخدش فلوس قالولي لا مش هينفع استني شهرين، كانوا عايزين يطلعوني تسجيل اقنعتهم اني أطلع هوا قبل ظهوري بيوم قالولي لا مش هينفع لازم تجددي العقد 3 سنين رفضت أجدد؛ لأن دول ناس موقفوش جنبي”.

وأكدت ريهام أنها كانت تعمل طوال الفترة الماضية في القناة بامكانيات ضعيفة، وتحملت حتى تصنع من الفسيخ شربات على حد قولها، متابعة “رفضت التجديد نزلوا بيان سب وقذف واني بستخدم البرنامج لأغراضي الشخصية وبغلط في رموز الدولة وتسببت في أضرار كتير للقناة، وطبعا كل ده كذب لأنه لو صح عايزين يجددوا معايا ليه، واشتغلت معاهم ازاي 8 سنين لو حقيقي يبقى هما مشتركين معايا في كل ده”.

واتهمت ريهام “النهار” بأنه تحاول ركنها على “دكة” الاحتياطي للقضاء عليها، وطالبت بتدخل “مكتب العمل”، “المجلس الأعلى للإعلام” و”نقابة الإعلاميين”، حتى تتمكن من الحصول على حقها.

https://www.facebook.com/reham.esmat.31/videos/2225768674312628/