بدأ الإعلامي أسامة كمال، برنامجه “مساء DMC” بمقدمة نارية جديدة قال فيها إن مصر ليس لها متحدث رسمى ولكن لها رموز وأخلاق وتفاصيل تتحدث عنها والاستعلاء على مصر ما بيعديش لا من حد برانا ولا حد جوانا”.
وقال خلال برنامج “مساء DMC”: “مصر مش شخص واحد عظيم ولا حاجة واحدة حلوة، مصر حاجات كتير حلوة وناس كتير حلوة وعظيمة، مصر مش مؤسسة واحدة لكن مؤسسات كتير”.
وتابع: “لما نتكلم عن مصر بيكون قصدنا محمد صلاح وصالح سليم والشاذلي والفناجيلي ومسعد نور وحسن شحاتة وفاروق جعفر والخطيب بيبقى فنانين النهاردة وبيبقى أم كلثوم وعبد الوهاب وعبد الحليم لسه مصر بلد الأهرام ومحمد على وسعد زغلول زى ما هيه بلد السيسي وكل رجالة وستات النهاردة”.
وأكمل: “مصر على مدى التاريخ طلعت ونزلت، بس طلعت ونزلت في إيه؟ في اقتصاد ممكن، في ضعف التعليم، احتمال، في انعدام خدمات، برضه ممكن، بس في أحلك الظروف كان فيه رموز الكل احترمها”.
واستطرد:”هو الناس لما بتعجب ببلد وبتشاور عليه وتقول دة بلد محترم بيبقى عشان حاجة واحدة وللا عشان مجموعة حاجات إن ما كانش كل حاجة؟. .صعب تشاور على بلد أو شعب عشان حاجة واحدة، وصعب تعجبك بلد وأنت مش عاجبك شعبها لأنه في النهاية الشعب اللى عمل الحاجات الحلوة في البلد أو عمل الحاجات الوحشة.. هتلاقي نفسك وأنت بتتكلم عن بلد محترمة بتقول شفت الألمان؟ شفت اليابان؟ شفت سنغافورة؟”.
كانت مقدمة الإعلامي أسامة كمال في حلقة الأمس من برنامجه “مساء DMC” تصدرت محور اهتمام عدد كبير من مختلف نشطاء مواقع التواصل الاجتماعي، والتي انتقد خلالها اتحاد الكرة بسبب الأزمة المتعلقة بمباراة الأهلي وبيراميدز في كأس مصر، قائلًا: “لما إحنا قبلنا الاستثمار الأجنبي في الكورة هو كان شرط المستثمر إنه لازم ياخد الدوري؟”.
