قررت “عليا.أ”، 36 عامًا، رفع دعوى خلع على زوجها، بعد 4 سنوات زواج، بعد أن طلب من زوجته الدخول في علاقة مع رجل آخر لينفق عليهما.

وقالت “عليا”، أنها تحملت كثيرا بعدما ترك زوجها العمل دون أن يبحث عن بديل لتوفير متطلبات زوجته وابنته ذات الـ 3 سنوات، مشيرة إلى أنها اندهشت من موقف زوجها الذى استمر عاما كامل دون عمل معتمدًا على أموال زوجته، وتابعت: “بقى مطلوب مني بجانب إني بشتغل أطبخ واتابع البنت أعمل كل حاجة وهو واقف بيتفرج عليا مش عايز يعمل أي حاجة وكأنه مصدق إنه ساب الشغل، رغم إني  مكنتش باخد غير 500 جنيه وطبعا مكنش مكفي متطلبات البنت”.

وتابعت الزوجة: “لما طلبت منه إنه يشيل عني الحمل شوية كان رده عليا مش لاقي شغل يتناسب مع إمكانياتي والمرتبات ضعيفة يبقى إيه اللي يخلينى اشتغل، وفي يوم لاقيته بيقولى الـ500 جنيه اللي بتجبيهم دول مش عاملين حاجة ولا هيعملوا حاجة فلازم يكون فيه حل تاني وقالي في راجل عجوز عنده 60 سنة وأيامه معدودة محتاج واحدة تدلعه وتشوف طلباته وهيدفعلها اللي هي عايزها”.

كلمات وقعت على الزوجة الثلاثينية كالصاعقة عندما طلب منها زوجها أن تقوم بهذا الدور، “أنا مش عارفة هو ازاي طلب مني كده كنت فاكراه بيهزر بس لأسف طلع بيتكلم جد وعايزنى أعيش مع راجل تاني علشان هو مش قادر يكفي بيته”، فقررت “عليا”، بعدها رفع دعوى خلع على زوجها بعد رفضه تطليقها.