تحدثت المخرجة إيناس الدغيدي عن النجم عادل إمام، وطمأنت الجمهور عليه مؤكدة أنه بخير فقط يريد أن يعيش في سلام.
وقالت إيناس الدغيدي خلال لقائها في برنامج “القرار” من تقديم نادية الزعبي عبر قناة “الغد”: “بيتهيألي إن عادل إمام اكتفى، نجاح ونجح وفلوس وعمل وحب الجمهور وأخده، وصل لمرحلة مراجعة نفسه وهو عايز إيه من الدنيا، اعتقد وصل لمرحلة السلام النفسي وعايز يستمتع بحياته، عادل إمام عمره ما استمتع بحياته طول عمره بيشتغل مسرح وسينما أكتر فنان اشتغل، لو عندك آلة ليها عمر ما بالنا البشر هو النهاردة قاعد مبسوط بحياته وعيلته وأحفاده”.
وتابعت إيناس الدغيدي: “طبعا كبر كلنا بنكبر السن مش عيب وأكيد خلاص مش عايز الصخب وحد يكتب عنه حاجة، لا المرض معايرة ولا السن معيارة كل الناس هتكبر والمرض ربنا ميكتبوش على حد”.
وأكملت إيناس الدغيدي: “أنا عرفت من خلال أصحابه يسرا ولبلبة أن هو طبيعي بس خلاص مش مهتم بكل ما يحدث ومش عايز يسمع حاجات وحشة بيقولهم لما يكون في خبر وحش متقولوش مش عايز أعرفه هو عايز يعيش في سلام، وأنا بطلب من الجمهور أن يسيبوا عادل إمام في سلام يقضي أيامه اللي باقية في حياته مرتاح بدل ما كل يوم إشاعة أكيد بتضايقه”.
وكثيرا ما تنتشر شائعات عن إصابة عادل إمام بمرض الزهايمر خاصة بعد اختفائه وعدم ظهوره.
يذكر أن آخر أعمال النجم عادل إمام كان مسلسل “فالنتينو” في رمضان 2019، وشاركه البطولة كل من داليا البحيري، ودلال عبد العزيز، وعمرو وهبة، ورانيا محمود ياسين، وبدرية طلبة، وهدى المفتي، وسليمان عيد، وحمدي الميرغني، وعدد كبير من الوجوه الجديدة، وتأليف أيمن بهجت قمر، وإخراج رامي إمام.
