بنت عملت خير ورجعت كيس شيبسي لتتصدق بثمنه لمحتاج تصرف بريء في لحظة عفوية للبنت بدون تفكير وكان ممكن تعدي.. لكن لأ.. مش هنسيبها في حالها ويلا يابطلة وفين أبوكي وإللي ربوكي نطاردهم بعدساتنا الفضولية والأسئلة السخيفة عن أين نشأت وترعرعت وماذا كان يقول لها أبوها حتي تأتي بهذا العمل البطولي؟؟
هو في إيه ؟ هي البلد دي جري لها إيه ؟ هي الناس للدرجة دي إتخبلت ؟
تصرف عادي لبنت طبيعية سوية عينها مليانة عملته باقتناع بينها وبين نفسها وربنا وحده إللي يقدر يجازيها ليه بتكسروا براءتها وتشوهوا طفولتها بشهرة خادعة وأسئلة دمها تقيل وتغيروا حياتها بين يوم وليلة هي كانت مبسوطة بتصرفها العفوي وكانت ناوية تمشي في حال سبيلها قريرة العين بتصرفها
ليه يجي شوية متطفلين يشقلبوا حياتها رأساً علي عقب ويزعجوا أهلها
البنت هاتقضي كام يوم في شهرة ومقابلات ولقاءات طيب وبعدين؟ تفتكروا هاتقدر ترجع لحياتها الطبيعية تاني بعد مارفعتوها في السما وخليتوها تريند ؟
هاتعرفوا ترجعولها براءتها وعفويتها لو أتكرر نفس المشهد معاها ولا هاتصبح ماشية تتلفت وراها يمكن حد يصورها والبراءة والعفوية تتحول لتكلف وإدعاء وبحث عن لقطة؟
الله يسامح اللي إنتهك عفويتها وبراءتها وخللي إللي مايشتري يتفرج عليها
استنوا بقي قناتها علي اليوتيوب وفديوهاتها علي التيك توك بعد كدة..
منه لله التريند.
